Plantun de Prouvènço

Pèr coumpara dos planto d'encò nostre

Lotus corniculatus subsp. alpinus & Eschscholzia californica

Embriago-cabro

Lotus corniculatus subsp. alpinus

Fabaceae Leguminosae

Àutri noum : Galassoun, Pèd-d'aucèu, Jauneto, Cap-rous, Lentiholo.

Noms en français : Lotier des Alpes, Lotier corniculé.

Descripcioun :
Aquelo meno d'embriago-cabro, subsp. alpinus, trachis dins li pelouso d'auto mountagno. Coume tóuti li Lotus se recounèis à si fueio di tres fuioun large groupa e si dos estipulo sus lou coustat. Èi mai pichoto emé de flour pu grosso que lou tipe corniculatus, coumun en plano, e souvènt rouginasso.

Usanço :
Li jóuini brout soun manja en Bousnìo (F. Couplan, op.cit. p. 215), pamens li flour caupon d'acide cianidri. La planto èi marrido pèr li bèsti que douno lou lourdige, embriago (embriago-cabro), coume l'avien vist nòstis àvi. A de prouprieta sedativo e antispasmoudico (contro li mau de nèrvi).

Port : Erbo
Taio : 5 à 10 cm
Fueio : coumpausado
Tipe bioulougico : Emicriptoufite
Cicle bioulougico : Planto renadivo

Gènre : Lotus
Famiho : Fabaceae
Famiho classico : Leguminosae

Ordre : Fabales

Coulour de la flour : Jauno
Petalo : irreguliero
Ø (o loungour) flour : 1 à 1,8 cm
Flourido : Printèms - Estiéu

Sòu : Si
Autour basso e auto : 2200 à 2800 m
Aparado : Noun
Jun à setèmbre

Liò : Pelouso
Estànci : Subaupen à Aupen
Couroulougi : Ouroufito-Sud-Éuroupo
Ref. sc. : Lotus corniculatus subsp. alpinus (DC.) Rothm., 1963

Pavot(-de-Califournìo)

Eschscholzia californica

Papaveraceae

Nom en français : Pavot de Californie.

Descripcioun :
Lou pavot-de-Califournìo se rescontro d'aqui e d'eila dins lis escoumbre e lis ermas proche d'oustau. Es un poulit pavot fourestié emé de gràndi flour jauno o aranjado e de fueio que dounon d'èr à-n-aquéli di fumo-terro. Lou fru (boursèu) se raprocho de li de l'erbo-dóu-faiò.

Usanço :
Estènt un pavot, a d'usanço proche de Papaver somniferum, pamens en mens fort (e sa culturo es autourisado). Es un remaiso doulour, ajudo à dourmi e èi bon contro lis ànçi. Ei bessai manjadis, coume lis àutri pavot, mai n'en sabèn pas rèn.